Prej dy ditësh është paralajmëruar situatë problematike për shkak të kushteve atmosferike, ndërsa sot si pasojë e reshjeve ka pasur probleme në disa qytete.
Në kuadër të përkeqësimit të motit kur priten edhe përmbytje, ministrja e Mbrojtjes, Olta Xhaçka kërkoi nga të gjitha bashkitë marrjen e masave për t’i paraprirë situatës problematike.
Xhaçka tha se Forcat e Armatosura janë në gatishmëri për të qenë pranë banorëve në çdo moment.
Gjithë vendi është i përfshirë nga moti i keq dhe shirat e rrëmbyeshëm kanë filluar të shkaktojnë problemet e para në rrjetin elektrik dhe në rrugët e vendit.
Problem janë shfaqur edhe në portet e Durrësit e Sarandës, ku si pasojë e dallgëve janë pezulluar aktivitetet.
Disa fshatra të Gjirokastrës janë prej orësh pa energji elektrike, ndërsa probleme ka pasur në Përmet, Këlcyrë, Zagori e Tepelenë.
