Një ngjarje e pazakont ka ndodhur ditën e sotme në Kosovë, pasi ministrit të Mjedisit, Liburn Aliu i është vjedhur makina mëngjesin e së mërkurës. Pas denoncimit në Polici, të shoferit të ministrit Aliu, mjeti tip Audi është ndaluar në pikën kufitare të Morinës teksa po hynte në Shqipëri. Policia lajmëron se ka vënë pranga drejtuesin e saj, shtetasin me iniciale B. S., banues në Obiliq.
Shoferi deklaroi se e kishte parkuar mjetin në ambientet e Ministrisë, por kur ka shkuar në orët e para të mëngjesit nuk e ka gjetur aty.
“Në PKK Qafë Morinë, në hyrje të RSH, shërbimet e Policisë Kufitare, në vijim të punës për goditjen e krimeve ndërkufitare, si rezultat i kontrolleve me përzgjedhje, kanë kaluar në vijë të dytë për kontroll më të imtësishëm, automjetin tip “Audi A3”, me drejtues shtetasin B. S., banues në Obiliq, Kosovë. Gjatë verifikimit ka rezultuar se automjeti që drejtonte 43-vjeçari, ishte i vjedhur në Kosovë dhe ishte në pronësi të një institucioni shtetëror. Në përfundim të veprimeve proceduriale, specialistët për Hetimin e Krimeve në Komisariatin e Policisë Tropojë arrestuan në flagrancë, për veprën penale “Trafikimi i mjeteve motorike”, shtetasin B. S., 43 vjeç, banues në Obiliq, Kosovë” – thuhet në njoftimin e Policisë.
