Pas reagimeve të ashpra të aktivistëve të trashëgimisë kulturore dhe së fundi të politikës, Ministria e Kulturës sqaron ku shkoi topi i tërhequr me vinç nga rrënojat, ku po hidhet beton për ndërtimin e Sheshit “Veliera” në Durrës.
Megjithëse ka një sekuestro të vendosur mbi këtë shesh nga Përmbarimi, Ministria sqaron në një deklaratë, përse e theu këtë masë të rreptë sigurie.
Nuk ka ende një deklaratë zyrtare për rrënojat e Perandorit August, ndërsa Vangjush Dako vazhdon me këmbëngulje ngritjen e veprës së tij të betonit, e cila varros historinë e lashtë të qytetit që ai drejton prej kaq vitesh.
Më poshtë deklarata e Ministrisë së Kulturës:
Në respekt të opinionit publik dhe detyrimit për informimin e tij, lidhur me reagimet e imazhet që kanë qarkulluar sot në media për gërmimet arkeologjike që po zhvillohen pranë projektit të mbikalimit në Durrës, Ministria e Kulturës sqaron se:
Gërmimet arkeologjike, dokumentimi dhe transporti i objekteve arkeologjike në ambientet e Muzeut Arkeologjik të Durrësit, po realizohen në zbatim të vendimit Nr. 31 datë 01.03.2017 të Këshillit Kombëtar të Arkeologjisë, specifikisht pika II dhe V e tij, ku përcaktohet kryerja e gërmimeve arkeologjike nga Instituti i Arkeologjisë, nën mbikëqyrjen e Agjencisë së Shërbimit Arkeologjik dhe Drejtorisë Rajonale të Kulturës Durrës, për gjurmimin e linjës periferike perëndimore të bastionit, të zbuluar nga sondazhi arkeologjik, përgjatë Bulevardit “Epidamn”, deri në pikëtakimin me murin bizantin, me qëllim evidentimin e planimetrisë ndërtimore të tij.
Në po këtë vendim të para tri ditëve kërkohet qartësisht se të gjitha gjetjet arkeologjike të cilat do të dalin, të dokumentohen dhe më pas të depozitohen pranë Muzeut Arkeologjik, Durrës.
Të gjitha proceset arkeologjike po kryhen nga Instituti i Arkeologjisë, i cili njëkohësisht është edhe institucioni më i lartë në vend i specializuar për kërkime shkencore në fushën e arkeologjisë.
Gjithashtu e gjejmë me vend të sqarojmë se:
– Topi që shihet në fotot e bëra publike nuk është strukturë arkeologjike apo rrënojë.
– Topi dhe gjylet e tjera janë objekte të lëvizshme të kulturës materiale dhe si të tilla nuk mund të qëndrojnë në vendin, ku zbulohen, por duhet të lëvizen drejt muzeut.
– Pesha e madhe e Topit, e bënte të detyrueshme përdorimin e një krahu eskavatori, për ta ngritur.
– Topi u lidh me një zinxhir me veshje plastike për të mos e dëmtuar dhe më pas u transferua drejt muzeut arkeologjik për t’u trajtuar më tej dhe më pas të bëhet i ekspozueshëm, në zbatim të vendimit të mësipërm të Këshillit Kombëtar të Arkeologjisë.
Bashkëngjitur fotot e dy Topave dhe Gjyleve që janë gjetur gjatë gërmimit arkeologjik të muajit shkurt, tashmë të vendosura në Muzeun Arkeologjik në Durrës për trajtim të mëtejshëm.
