Universiteti Princtonin në bashkëpunim me Programin për Shkencë dhe Siguri Botërore kanë realizuar një simulim të frikshëm për armët bërthamore. Modeli është prezantuar për herë të parë në vitin 2017, ndërsa është rikthyer sërish në vëmendje për shkak të situatës të tensionuar në botë.
Sipas këtij parashikimi, në vetëm 5 orë do të humbnin jetën të paktën 34 milionë persona. Modeli, i bazuar mbi të dhënat zyrtare mbi vendndodhjen e armëve bërthamore, objektivat, parashikon miliona viktima vetëm në orët e para të një konflikti të tillë bërthamor. Mbi 59 milionë njerëz të tjerë do të plagoseshin, pa llogaritur këtu dhe ata që do të vdesin nga rrezatimi.
Simulimi mund të duket në vetvete si shumë shqetësues, por mund të përdoret nga qeveritë e vendeve të ndryshme për të hartuar plane dhe për të informuar popullin se si mund t’i mbijetojnë një sulmi. Sulmi nis brenda kontekstit të armëve konvencionale, që do të thotë një konflikt jobërthamor.
Sipas tij, Rusia mund të lëshojë një raketë paralajmëruese nga baza pranë Kaliningradit në drejtim të Detit të Zi për të ndalur avancimin e NATO-s, e cila më pas hakmerret me një sulm ajror taktik.
Më pas, Rusia dërgon 300 koka bërthamore drejt bazave të NATO-s dhe trupave që avancojnë në Europë përmes avionëve apo raketave me rreze të shkurtër veprimi. Aleanca e Atlantikut verior më pas do të kundërpërgjigjet me 180 bomba bërthamore të lëshuara nga avionët.
Në këtë moment, viktimat vlerësohen të jenë mbi 2.6 milionë, ndërkohë që në një periudhë prej 3 orësh pjesa më e madhe e Europës do të jetë e shkatërruar. Për shkak të kësaj, NATO do të reagojë përmes SHBA-së dhe flotës së nëndetëseve duke nisur 600 koka bërthamore në një sulm nuklear strategjik.
Rusia, nga ana tjetër, për të mos lejuar që arsenali i saj të shkatërrohet do të lëshojë të gjitha raketat që ka në dispozicion nga nëndetëset dhe bazat ushtarake. Sipas parashikimit, do të ketë të paktën 3.5 milionë viktima në këtë fazë të luftës që do të zgjaste 45 minuta.
