Kryetari i Kuvendit përshëndet Asamblenë Rajonale të Grave Parlamentare
Kryetari i Kuvendit, Ilir Meta, propozon përfaqësim 50% të grave në listat e kandidatëve për deputet. I pranishëm në Asamblenë Rajonale të Grave Parlamentare, Meta propozoi ndërhyrje në kodin elektoral për të jetësuar këtë propozim para zgjehdjeve të ardhëshme parlamentare.
“Besoj se ka ardhur koha që ne atë hap që ndërmorëm në zgjedhjet vendore për përfaqësimin e grave ta ndërmarrim edhe në zgjedhjet parlamentare. Kjo mendoj që do t’i bëjë nder Kuvendit, jo thjesht do t’i japë një pamje të re, jo vetëm do t’i japë një imazh dhe një integritet të ri, por jam i bindur që do t’i japë edhe një përmbajtje të re shumë cilësore dhe ajo që është më e rëndësishmja, shumë më njerëzore dhe më sociale se sa deri tani. Dua t’iu siguroj për mbështetjen time si Kryetar i Kuvendit në të gjitha nismat tuaja, që synojnë rritjen e fuqizimit të gruas, jo thjesht të rolit të saj në Kuvend dhe në vendimmarrje, por në gjithë shoqërinë tonë, për të mbështetur të gjitha iniciativat për përmirësimin e legjislacionit në këtë drejtim”, tha Meta.
Ai përshëndfeti praninë e grave parlamentare të rajonit ndërkohë që bëri një vlerësim të veçantë për gratë e PD-së që ishin të pranishme në këtë aktivitet, duke thyer bojkotin dhjetëditorë të vendosur nga PD-ja ndaj Kuvendit.
