Pas zgjedhjes president, Ilir Meta dha një deklaratë për median ku tha se sipas statutit të LSI-së në krye të partisë do të vendoset zv/kryetari Petrit Vasili deri në fund të mandatit që ka nisur.
Meta do të dorëzojë kryesinë e partisë së Lëvizjes Socialiste për Integrim në 24 korrik, ditë që do bëj betimin si president.
I pyetur nëse LSI do të rrudhet pas largimit të tij nga partia, Meta tha se nëse do të rrudhet do të thotë se e meriton, por LSI nuk është e varur nga një person i vetëm, por nga një staf i shkëlqyer.
Meta nuk u shpreh i lumtur për postin e ri, por i nderuar.
“Nuk jam i lumtur për shkak të rrethanave politike, por jam i nderuar të jem president i Shqipërisë,” –tha Meta.
Ai shtoi se do të punojë për një klimë bashkpunimi mes palëve në politikë.
Në vijim të përgjigjes ndaj interesit të mediave pas zgjedhjes në krye të shtetit, Ilir Meta ka shprehur besimin se kriza politike në vend do të zhbllokohet dhe për këtë ai ka besim tek një figurë kyçe e opozitës, Sali Berisha.
“Ju e dini që ai është dobësia ime. Por besoj tek eksperienca e tij dhe e politikanëve të tjerë tek PD që të kontribuojnë për përmirësimin e kësaj situate”, ka thënë Meta për mediat.
