“Lëvizja Socialiste për Integrim qëndron qartë si faktori më i qëndrueshëm më stabilizues, më i arsyeshëm më bashkëpunues, si një garanci për stabilitetin e vendit, për sigurinë e vendit dhe të institucioneve dhe qytetarëve shqiptarë”- kështu është shprehur kryetari i LSI-së Ilir Meta në një takim me të rinjtë e njësisë nr.7 në kryeqytet.
Gjatë fjalimit të tij përpara të rinjve, Meta u shpreh se partia që ai drejton nuk ka vënë interesat e saj të ngushta dhe të momentit përpara interesave të vendit, gjë që duhet të udheheqë çdo forcë politike dhe çdo politikan të ndërgjegjshëm.
Meta u ndal edhe tek nevoja që Shqipëria ka për arsimim më të mirë duke u bërë vend që ofron mundësi të reja dhe jo të braktiset.
“Ne e bëjmë këtë me shumë bindje, përgjegjshmëri dhe dashuri, sepse për ne të rinjtë janë të parët dhe ne duam që të gjithë të kenë një shans për një arsim më të mirë dhe për punë më të mirëpaguara këtu në vendin tonë. Shqipëria evropiane nuk duhet të jetë një Shqipëri që braktiset, duhet të jetë një Shqipëri që ofron mundësi të reja, shanse të reja për të gjithë ata që jetojnë këtu dhe për ata shqiptarë që e duan vendin e tyre”- tha kreu i LSI-së.
Të pranishëm në këtë aktivitet ishin deputetja e LSI-së, Kejdi Mehmetaj, Sekretari i Përgjithshëm i LSI-së, Endrit Braimllari, Kryetarja e Lëvizjes Rinore për Integrim, Floida Kërpaçi, etj.
Gjatë fjalës së tij, Braimllari theksoi domosdoshmërinë për të mbështetur rininë si e ardhmja e vendit. Braimllari theksoi se Lëvizja Socialiste për Integrim punon dhe do të punojë çdo ditë për t’i dhënë një shans çdo të riu.
