Presidenti Ilir Meta nuk ka pranuar të komentojë vendimin e Gjykatës Kushtetuese, pa e pasur atë të arsyetuar. Në një intervistë për mediat, Meta u shpreh se të gjitha rezervat që kanë pasur për Gjykatën Kushtetuese i kanë të dokumentuara. Ai gjithashtu deklaroi se ai dhe ekipi i tij ligjor ishin të përgatitur për të shkuar në gjykatat evropiane.
“Nuk ka asnjë arsye që unë të komentoj një vendim që nuk e kam në dorë. Ne të gjitha pretendimet i kemi, por nuk i kemi bërë publike. Ne të gjitha rezervat që kemi pasur i kemi dokumentuar, sepse ne kemi qenë të përgatitur për të shkuar në gjykatat evropiane” – tha Meta.
Meta gjithashtu tha se do ta vazhdojë betejën ligjore me Kuvendin, që sipas tij paraqiti prova të manipuluara në seancën e fundit të Gjykatës Kushtetuese. Më tej ai u shpreh se ekipi i tij e ka shpartalluar procedurën me fakte.
“Po presim që prokuroria të veprojë dhe opozitë të veprojë. Opozitë është një parlament dhe kjo është e rëndë. Ata duhet të shkojnë në parlament dhe të kërkojnë një seancë të jashtëzakonshme dhe do të kërkojë të hetohej edhe në parlament edhe në prokurori;. Si mund të ndodhë që një shkresë të ketë dy data dhe të ketë ndryshime. Kjo paraqitet si provë e re nga Kuvendi. Kjo provë e re jepet sepse ekipi i presidentit e ka shpartalluar procedurën me fakte dhe duke menduar që ekipi ynë nuk do hetonte ç’përfaqëson kjo provë, mund të shpërbente si alibi” – u shpreh Meta.
