Kryetari i Kuvendit takohet me Prokurorin e Përgjithshëm, Adriatik Llalla
Kryetari i Kuvendit, Ilir Meta, publikoi sot urdhrin për ngritjen e stukturës së posaçme për dekriminalizimin. Pranë kësaj strukture që do të jetë pjesë e Prokurorisë, do të dorëzohen dhe administrohen formularët e vetëdeklarimit, për zyrtarët e lartë të shtetit e politikës. Pak momente pas publikimit të vendimit, Kryetari i Kuvendit Ilir Meta priti në një takim Prokurorin e Përgjithshëm, Adriatik Llalla.
Përmes një njoftimi për mediat, Kuvendi sqaron se Meta dhe Llalla kanë diskutuar mbi vijimin e procesit të zbatimit të ligjit për dekriminalizimin, përgjegjësitë që ai ka si organ përgjegjës për administrimin e vetëdeklarimeve, si dhe bashkëpunimin me këtë institucion në zbatim të parashikimneve ligjore.
Vendimi i Metës
Kryetari i Kuvendit te Shqipërisë në vijim të detyrimeve që burojnë nga ligji 138/2015 “Për garantimin e integritetit të personave që zgjidhen, emërohen ose ushtrojnë funksione publike” si dhe Vendimi i Kuvendit të Shqipërisë “Për përcaktimin e rregullave të detajuara mbi zbatimin e ndalimeve të parashikuara në ligjin 138/2015”, ka nxjerrë urdhërin për caktimin strukturës së posaçme, pranë të cilës do të dorëzohen dhe administrohen formularët e vetëdeklarimit, për subjektet të cilët në zbatim të akteve të sipërcituara e paraqesin atë pranë tij.
Ndërkohë, Kuvendi i Shqipërisë në përputhje me parashikimet e akteve të sipërcituara, ka hartuar dhe publikuar në faqen zyrtare të tij Rregjistrin “Për vetëdeklarimin pranë Kryetarit të Kuvendit të titullarëve apo anëtarëve të organeve kushtetuese, institucioneve të krijuara me ligj, si dhe funksionarët politikë të Kuvendit”.
