Në një konferencë të jashtëzakonshme mëngjesin e sotëm, presidenti i vendit Ilir Meta ka argumentuar vendimin për anullimin e zgjedhjeve të 30 Qershorit.
Meta shprehet se është detyrë e të gjitha organeve të sigurojnë lirinë e zgjedhjeve, përndryshe i vetmi autoritet kushtetues është Presidenti i Republikës.
Presidenti i vendit tha se zhvillimi i zgjedhjeve në 30 qershor do të na çonte drejt një konflikti civil që përbën rrezik serioz.
“Është fakt publik që në mënyrë të vazhduar partitë e opozitës kanë ngritur shqetësimin, e bazuar në fakte dhe të dhëna duke iu referuar raporteve nga OSBE/ODHIR zgjedhjet e planifikuara për zhvilllim në datë 30 qershor nuk do të jenë të lira dhe të ndershme. Ata dëshirojnë të marrin pjesë në zgjedhje por me kushtin për tu siguruar lirinë e zgjedhjeve.
Është detyrë e te gjitha organeve që ta mundësojnë këtë në respekt të parimit të pluralizmit. Nëse ky detyrim nuk përmbushet nga qeveria i vetmi autoritet kushtetues është Presidenti i Republikës.
Presidenti ka vendosur të ushtrojë komptencë për të kontribuar në realizimin e të drejtës kushtetuese për të zgjedhur. Presidenti do të kontribuojë për ndërtimin e të drejtës themelore për të zgjedhur.
Zhvillimi i zgjedhjeve krijon rrezikun e një konflikti civil që përbën një rrezik serioz. Presidenti ka vënë re se sjellja e aktorëve politikë në vend rrezikon stabilitetin e vendit”, u shpreh Meta.
Më tej presidenti tha se ka ndjekur me vëmendje protestat e zhvilluara nga opozita si dhe përgjigjet nga mazhoranca të cilat sipas tij, kanë provokuar njëra tjetrën.
“Presidenti ka ndjekur të gjitha protestat ashtu si ka evidentuar përgjigjen e mazhorancës. Të dy palët kanë bërë nxitje për provokime ndaj njëra tjetrës.
Zhvillimi i protestave dhe deklarimeve të opozitës si dhe antimitingjet e mazhorancës nuk japin siguri për zgjedhje të lira të ndershme.Në këtë mënyrë nëse dita e zgjedhjeve do të kthehet në një betejë atëherë do të humbisnin vlerën e tyre në një shoqëri demokratike. Në kushtet aktuale anullimi i zgjedhjve është mjeti i vetëm i zgjidhjes së krizës poltike. Shtyrja do të shërbejë për dakordësinë e një dialogu”, tha mes të tjerash Meta.
