Presidenti i vendit, Ilir Meta ka reaguar lidhur me grabitjen e djeshme në aeroportin e Rinasit, ku një grup i superorganizuar vodhën rreth 7 milionë euro.
Në një konferencë për shtyp, Meta e ka cilësuar ngjarjen tronditëse dhe të papranueshme faktin që kjo ajo ishte e përsëritur. (kujtojmë grabitjen e aeroportit më 2015 dhe 2017).
Meta kërkoi të hetohen dhe të merren masa për të gjitha autoritetet përgjegjëse.
“Nisur nga ngjarja tronditëse e grabitjes së djeshme ndiej detyrimin dhe përgjegjësinë për këtë komunikim të drejtpërdrejt me ju dhe qytetarët. Përsëritja e kësaj ngjarje brenda një objekti të sigurisë së veçantë është e papranueshme. Si vend anëtar i NATO-s kemi detyrimin të garantojmë dhe standardet më të larta të sigurisë. Si kryetar i Këshillit të Sigurisë kombëtar në 16 maj të vitit 2018 kam organizuar mbledhjen e këtij këshilli me objekt gjendjen e sigurisë kombëtare.
Pika e tretë e axhendës së këtij takimi ishte pikërisht raporti për pikat strategjike portuale dhe aeroportuale të Republikës së Shqipërisë. Kam ngritur shqetësimin lidhur me mungesën e përgjegjësive të qarta që viheshin re mbi garantimin e sigurisë në aeroportin Nënë Tereza, mangësitë në akses dhe ndërhyrjen e Policisë së Shtetit në raste rreziku”, deklaroi Presidenti.
