Kryetari i Kuvendit Ilir Meta u bëri apel palëve për t’u ulur për dialog me qëllim zgjidhjen e krizës politike.
Nga Skrapari, Meta deklaroi se është shumë e rëndësishme të gjendet një zgjidhje në ditët që vijnë në mënyrë që vendi të ecë në rrugën e stabilitetit.
“Mesazhi i LSI-së është mjaft pozitiv dhe këtë mesazh duan të gjithë shqiptarët. Është shumë e rëndësishme të gjendet një zgjidhje në ditët që vijnë. Ne do të bëjmë çdo gjë që Shqipëria të ecë në rrugën e stabilitetit, të legjitimitetit të institucioneve dhe të paqes sociale.
Të gjithë duam paqen sociale në familjen tonë, në vendin tonë, sepse pa këtë nuk ka as siguri, as arsimim më të mirë, as ekonomi më të mirë, as punë më të sigurta dhe padyshim nuk ka një perspektivë në këtë vend”, deklaroi Meta.
