Sipas të dhënave të Organizatës Ndërkombëtare për Migrim (IOM), 60 nga 272 emigrantë që janë mbytur në janar 2016 në ujrat e detit Egje ndërmjet Turqisë dhe Greqisë ishin fëmijë.
Trupat e nëntë emigrantëve, duke përfshirë dhe dy foshnja, janë gjetur të martën e 2 shkurtit nga rojet bregdetare turke, pasi anija e tyre u mbyt.
Fëmijët përbëjnë deri më tani më shumë se një të tretën e emigrantëve që kalojnë detin nga Turqia drejt Greqisë. Shifrat në rritje të emigrimit të minorenëve kanë alarmuar UNICEF-in sot. “Fëmijët aktualisht përbëjnë 36% të atyre personave që përpiqen të kryejnë kalimin e rrezikshëm midis Turqisë dhe Greqisë,” bëri të ditur në një deklaratë Fondi për Fëmijët i Kombeve të Bashkuara. “Kjo shifër, megjithatë, mund të jetë më e madhe, pasi shumë të mitur nuk arrijnë të japin moshën para se ata të arrijnë në destinacionin e tyre,” thanë përfaqësues të këtij Fondi.
Në vendkalimet kufitare midis Greqisë dhe Maqedonisë “, fëmijët dhe gratë përbëjnë rreth 60%” të totalit të refugjatëve të luftës. Shifrat kanë ndryshuar ndjeshëm muajt e fundit, pasi në qershor, 73% e emigrantëve ishin burra në këtë kufi, dhe vetëm 10% ishin nën 18 vjeç. Përfaqësuesit e UNICEF-it theksojnë se fëmijët janë më të pambrojtur në kushtet e vështira të kalimit të detit. Shumë minorenë gjithashtu kanë mbërritur të pashoqëruar në Evropë. Agjencia Evropiane Koordinimi i policisë Europol vlerëson se më shumë se 10 mijë fëmijë emigrantë të pashoqëruar janë “zhdukur” në Evropë në 18-24 muajt e fundit, duke ngritur dhe dyshimin se shumë prej tyre mund të jenë shfrytëzuar, duke përfshirë edhe seksualisht, nga krimi i organizuar.
Sipas UNICEF-it, 35 mijë të mitur të pashoqëruar kanë kërkuar azil në Suedi, ndërsa Gjermania ka pritur më shumë se 60 mijë të mitur. Rreth 62.200 emigrantë dhe refugjatë, kryesisht nga Siria, Afganistani dhe Iraku, hynë në Evropë përmes Greqisë në janar, sipas IOM-it, rreth 20 mijë prej tyre ishin të miturit e pashoqëruar.
