Në sheshin para sallës së Parlamentit, në fillim të çdo seance bien në sy fotografë që i drejtojnë objektivat e tyre tek gratë deputete, të cilat shfaqen para tyre plot stil dhe sharm.
Ndonjëherë, të duket sikur je para ndonjë instituti mode dhe se aty brenda po zhvillohet ndonjë ballo, por në fakt jemi para Kuvendit dhe brenda diskutohen dhe miratohen ligje.
Thonë që fotografët porositen që t’i fiskojnë sa më tepër gratë deputete apo ministre, gjatë “sfilatës” së javës, foto që më pas do të bëjnë udhëtimin e rrjeteve sociale.
Padyshim që kujdesi për pamjen e jashtme është krejt i natyrshme tek një grua, qoftë kjo në karrierë apo e zakonshme. Por, ka protokoll të caktuar për gratë në politikë. Modelet që na vijnë nga perëndimi janë krejt ndryshe.
Kur është fjala për gra vendimarrëse pritet prej tyre një imazh brenda seriozitetit që i takon një ligjvënëseje, ministre apo kryebashkiakeje.
Dhe kur është fjala për gra ministre apo deputete të një vendi të varfër si Shqipëria, është diferencë e thellë me shumicën e grave që jetojnë në varfëri e me telashet e përditshme të jetës, të cilat me zor ia dalin të ushqejnë fëmijët.
