Me 25 vota pro dhe 52 kundër Kuvendi rrëzoi kërkesën e deputetes së PD, Ina Zhupa për mbajtjen e një interpelance me ministren e Kulturës Elva Margariti për menaxhimin e Butrintit.
Deputetja e PD ka sjellë dhe një herë në Kuvend shqetësimin për praninë e Richard Hodges në bordin për menaxhimin e Butrintit. Deputetja nxori deklaratat e tij lidhur me vendin tonë, ku ai deklaronte se në jugun e Shqipërisë nuk jetojnë shqiptarë.
“Ne mund të gjykojmë se a duhet një njeri i tillë me të tillë qasje të jetë në krye të bordit të menaxhimit të Butrintit. A është e dëmshme për identitetin dhe a rrezikojnë shqiptarët nesër u tjetërsohen gjetjet e Butrintit. A rrezikohen shqiptarët që në këtë 10-vjecar që është dhënë menaxhimi i Butrintit me koncension gjetjet të interpretohen si territor grek, a rrezikojmë që përkrah flamurit shqiptar në Butrint të vihet dhe flamuri grek? Historia e identiteti duhet ruajtur”, tha deputetja.
Zhupa tha se nga gjashtë propozimet për anëtarin e bordit, kërkoi mbi se cilat kritere është përzgjedhur Richard Hodges.
“Çfarë thanë ata 5 të tjerët që qenka Hoxhis më i mirë? Cilët kritere? Nuk ka më keq se kaq, me keq se kaq ka vritini shqiptarët, të na tregojë ministrja kur është hapur thirrja për këta njerëz, kush ka aplikuar, kriteret mbi të cilat janë përzgjedhur. A ka këtu plane të tjera që fshihen për Butrintin? Apo ka parë në CV që ka qenë këshilltar i Ramës kur ka qenë ministër i Kulturës. Para se te jeni deputete, jeni shqiptare, e duhet t’i kërkoni llogari ministres e të tërhiqeni nga vendimi që Hoxhis të jetë në Bordin e menaxhimit te Butrintit. Doja të isha duke kryer interpelancën, që ministrja të paraqiste arsyet e saj pse ka zgjedhur e ka vendosur në bordin e menaxhimit të Butrintit Richard Hodges. Arsyeja kryesore pse e kam kërkuar këtë interpelancë. Thotë që shqiptarët një vend artificial i krijuar artificialisht si një vendim politik dhe që në 1913 në Jug, në Butrint e Sarandë nuk kishte asnjë shqiptar e sipas Richard Hodges atje është tokë greke e Butrinti është grek“, tha Zhupa.
