Agjenci të shtypit, portale dhe media greke kanë përcjellë të plotë fjalën e kryetares së grupit parlamentar të PDIU-së, Mesila Doda në Kuvendin e Shqipërisë ditën e enjte. Agjencia “Balkaniko Periskopos” thotë që deputetja akuzon Vangjel Dulen për ekstremizëm.
Kjo agjenci shpjegon për publikun e saj, se kryetarja e grupit parlamentar të PDIU-së sulmoi kryetarin e PBDNJ-së, Vangjel Dule, sepse ky i fundit pretendon që nuk ka Çështje Çame apo genocid ndaj shqiptarëve, por thjesht kemi të bëjmë me probleme teknike.
Agjencia citon gjatë gjithë shkrimit 27.al, ndërsa boton fotot, me të cilat Mesila Doda vërteton në foltoren e Kuvendit lidhjet e Vangjel Dules me ekstremistët e Vorio Epirit dhe organizatës terroriste SVEVA. Më tej agjencia publikon videon e fjalës së plotë të ligjvënëses Mesila Doda.
Kurse “Pelasgos” bën me dije se deputetja Mesila Doda e ka akuzuar Vangjel Dulen se ka shkelur Kushtetutën e Shqipërisë dhe pavarësinë e vendit. Sipas medias greke në fjalë, Vangjel Dule shfaqet me simbolet e ekstremistëve të Vorio Epirit.
Edhe kjo gazetë boton fotot-fakte që ka treguar nga foltorja e Kuvendit, Mesila Doda. Më tej, “Pelasgos” shpjegon që Dule është i lidhur me deputetin nazist Kristos Papas dhe Rininë e Vorio Epirit, pa harruar organizatën terroriste SVEVA.
Është interesant fakti, që mediat greke e kanë raportuar këtë ngjarje politike pa bërë komente, por thjesht kanë raportuar besnikërisht lajmin, duke ju referuar më së shumti 27.al si burim informacioni.
