Mbledhja e dy qeverive/ deputetja e PDIU-së: Një pyetje për drejtuesit e politikës: A do jenë bashkë brezat e ardhshëm apo do vazhdojmë të jemi të huaj përjetësisht?
Deputetja e PDIU-së, Mesila Doda, reagoi sot për mbledhjen e dy qeverive, të Shqipërisë dhe Kosovës. Ajo vlerëson pozitivisht këtë bashkëpunim, por ka një mesazh të qartë për dy palët: “Politikanët duhet të punojnë jo për ta vjedhur e për ta ndarë, por për të bashkuar dhe për ta zhvilluar kombin.” Përmes një mesazhi në facebook, Doda komenton edhe deklaratën e Ramës, i cili përsëriti se Shqipëria dhe Kosova do të bashkohen nën flamurine BE-së. Ajo thekson se Shqiptarët kudo ku janë kanë veç një flamur, flamurin kuq e zi.
Reagimi
Sot u mblodhen në Prishtinë dy qeveritë shqiptare. Eshte lajm i mirë padyshim, edhe nënshkrimi i marrëveshjeve sektoriale, pasi ndihmon në bashkëveprimin mes Shqipërisë dhe Kosovës. Me këtë rast kisha një pyetje…kur do e heqin kufirin? Ose më së paku të lehtësojnë lëvizjen e njerëzve në kufi se për turpin e shteteve tona duket sikur jemi në gjendje lufte e jo dy shtete të të njëjtit komb.
Veçanërisht, do doja të dija a do ketë një strategji bashkimi të trevave tona? A do jenë bashkë brezat e ardhshëm apo do vazhdojmë të jemi të huaj përjetësisht?
Ky distancim i ndërgjegjshëm që politikanët e të dy krahëve po bëjnë është shërbimi më i keq që po i bëjmë kombit. Dhe meqënëse Europa sot nuk e di as vetë ku dhe si do jetë e ardhmja e saj, ju lutemi mos na nakatosni më me këtë historinë e bashkimit nën flamurin e Europës. Shqiptarët kudo ku janë kanë veç një flamur, flamurin kuq e zi. Politikanët duhet të punojnë jo për ta vjedhur e për ta ndarë, por për të bashkuar dhe për ta zhvilluar kombin.
