Kryebashkiaku: I siguroj të gjithë se asnjë rast i verifikuar mbifaturimi nuk do të mbetet pa u anulluar dhe asnjë familje e Tiranës nuk do të paguajë padrejtësisht asnjë qindarkë
Bashkia e Tiranës ka ngritur katër grupe pune për të verifikuar situatën problematike me mbifaturimet e ujit nga Ujsjellës Kanalizimet në Tiranë. Kryetari i Bashkisë së Tiranës, Erjon Veliaj sqaroi se ka ndjekur me shqetësim situatën dhe se ka ngritur grupet e punës për ta parë problematikën. Ai tha se asnjë familje e Tiranës nuk do të paguajë padrejtësisht asnjë qindrakë.”Kam ndjekur me shqetësim reagimet e shumta të qytetarëve për mbifaturimet e ujit të pijshem në muajin Janar dhe kam ngritur prej disa ditësh një grup verifikimesh për të katër zonat ku janë hasur problemet. Dua t’i siguroj të gjithë se asnjë rast i verifikuar mbifaturimi nuk do të mbetet pa u anulluar dhe asnjë familje e Tiranës nuk do të paguajë padrejtësisht asnjë qindarkë.
Ditën e hënë do të kemi një pamje të plotë e të qartë të situatës dhe padyshim do të nxjerrim edhe përgjegjësitë e duhura për shqetësimin që u është shkaktuar qytetarëve. Për këtë, kam njoftuar që mbrëmë aksionerët e UKT për mbledhjen e asamblesë në fillim të javës që vjen, ashtu siç e kërkon procedura ligjore”, tha Veliaj.
Kryetari i bashkisë Tiranë kërkoi ndjesë të gjitha familjeve që kanë hasur padrejtësisht mbifaturim të ujit. “Ujësjellësin e kemi gjetur në kushtet e një rrjeti të amortizuar nëntokë, por më keq akoma, të një rrjeti hajdutërie të pashembullt mbi tokë të pasurisë sonë të përbashkët. Ndaj dhe vendosja e rendit ligjor në shfrytëzimin e ujit të pijshëm është një domosdoshmëri jetike. Por, emergjenca e imponuar nga e shkuara, nuk mund të jetë kurrsesi justifikim për të mbifaturuar familjet tona. Kjo është e papranueshme dhe unë nuk do ta toleroj në asnjë mënyrë. Çdo mbifaturim do të anullohet dhe çdo fajtor do të mbajë përgjegjësi. Ndjesë kujtdo që i është shkaktuar ky shqetësim.”, Tha Veliaj.
Pak orë më parë, ministri i Brendshëm Saimir Tahiri, i kishte kërkuar kryebashkiakut të ndërhyrë për të zgjidhur me urgjencë situatën. Tahiri protestoi bashkë me qytetarët e Kombinatit për problemin e mbifaturimit të ujit.
