Në dispozicion të fermerëve janë 14 mln euro
Nesër nisin aplikimet për të përfituar nga skemat e mbështetjes qeveritare për bujqësinë. Këtë vit janë 14 milionë euro të përcaktuar si mbështetje për projektet bujqësore të fermerëve, agro-përpunuesve dhe investitorëve në infrastrukturën bujqësore. Suela Popa, drejtore e AZBR sqaron se “Për çdo mbjellje prej 1 hektarësh fermeri përfiton 250 mijë lekë të reja, ndërsa në rastin e investimeve, koncepti është bashkëfinancim 50 me 50 për qind ndërmjet shtetit e privatit. Fituesit e aplikimeve do të shpallen në mes të prillit dhe kriter i domosdoshëm për të fituar është që fermeri duhet të jetë i regjistruar në tatime dhe të ketë NIPT. Ministria e Bujqësisë ka detajuar drejtimet ku do të financohen paratë e skemës mbështetëse. Përveç subvencioneve, në planet te Ministrisë së Bujqësisë është nisja e skemës së garantimit të kredive për fermerët, e cila bashkëfincohet nga BERZH me një total prej 300 milionë eurosh në tre vite.
