Gjatë takimit që mazhoranca mbajti me veteranër e Luftës në kuadër të Ditës së Çlirimit të Shqipërisë, kryeministri Rama ka cituar fjalët e kancelares Angela Merkel, se, “Shqipëria ka ndryshuar rrënjësisht përmes reformave, të cilat duhet të vazhdojnë”.
Sipas tij, opozita i ka ngritur Shqipërisë një mur që i pengon asaj çeljen e negociatave, pasi ka bllokuar ligjin e Vetting-ut. Për këtë arsye, ai i ka bërë thirrje votuesve të opozitës që të ushtrojnë presion mbi lidershipin e PD për të zhbllokuar ligjin në fjalë.
Ndër të tjera, kryeministri ka falenderuar aleatin e tij qeverisës, Ilir Meta, pa të cilin, siç tha, “reformat nuk do të kishin qenë të mundura”.
I pranishëm në këtë takim, Meta është fokusuar më tepër tek simbolika e 29 Nëntorit, duke vlerësuar figurën e veteranëve dhe të rënëve.
“Duke vazhduar në këtë rrugë që kemi nisur ne do të plotësojmë idealet e atyre që ëndërruan për Shqipërinë. I përjetshëm qoftë kujtimi i tyre”, ka thënë Meta.
