Në një intervistë me gazetën prestigjoze angleze “The Guardian”, Presidenti i Kosovës, Hashim Thaçi, është optimist se vendi i tij mund të arrijë marrëveshje me Serbinë brenda vitit 2019, pavarësisht përplasjeve të muajve të fundit.
Thaçi tha se nga suksesi i bisedimeve do të varet e ardhmja e gjithë rajonit.
“Ne duhet që të ulemi në tryezë qoftë edhe me armikun më të madh, por pa vënë parakushte dhe për të dëgjuar njëri-tjetrin. Në rrethanat aktuale, me këto tensione, unë nuk shoh arsye që investitorët e huaj të vijnë dhe të investojnë në rajonin tonë. Vetëm marrëveshja paqësore do të sjellë prosperitet,” u shpreh Thaçi.
I pyetur rreth temës së ndryshimit të kufijve, Thaçi tha se çështja do të shtrohet për diskutim në çdo rast, por që korrigjimi nuk do të ndodhë kurrsesi mbi bazat e etnive.
Presidenti ka trajtuar edhe çështjen e tarifës doganore ndaj produkteve serbe që po aplikohet prej nëntorit të kaluar, duke shtuar se ajo nuk do të hiqet pa u shënuar progres edhe në drejtime të tjera.
