Ka përfunduar numërimi i votave në zgjedhjet e përgjithshme në Maqedoni.
Referuar të dhënave zyrtare, VMRO ka arritur të marrë 39.19% të votave duke siguruar momentalisht 51 deputetë, LSDM renditet e dyta me 37.85% të votave, por duke siguruar edhe ajo 49 deputetë, e treta renditet BDI-ja me 7.57% të votave me 10 deputetë.
Ndërkohë, BESA ka marrë 5.10% të votave e përkthyer me 5 deputetë, Aleanca për Shqiptarët 3.09% të votave ose 3 deputetë. Parti tjetër që ka siguruar dy mandate deputeti është PDSH-ja duke marrë 2.73%.
Të dyja partitë kryesore shpallën fitoren. Zaev i LSDM-së në opozitë qëndroi gjatë gjithë kohës së numërimit në shesh, por fitues u deklarua edhe VMRO-DPMNE e kryeministrit Gruevski.
Për fat të keq shqiptarët rezultojnë të kenë humbur disa mandate, kurse për herë të parë mësohet se një pjesë e shqiptarëve të ketë votuar për një parti maqedone si LSDM. Për shembull në Tanushë, ku dhe nisi konflikti i armatosur LSDM ka dalë fituese duke e lënë pas BDI-në e Ali Ahmetit. Ndërsa ka ndodhur çudia në Haraçinë, ku LSDM fiton me një kandidat shqiptar.
Tani pritet si do të kombinohen aleancat për të ngritur qeverinë e re. Nuk është çudi që nacionalistët sllavë të qeverisin, duke u mbështetur nga ligjvënësit e BDI-së. Megjithatë, mbetet për t’u parë, sepse lëvizjet e shahut në çështjen e aleancave paszgjedhore nuk ia heqin mundësinë as LSDM-së së Zaevit.
