“Kemi tendenca shthurjeje në punën e përditshme të gjyqësorit”
“Që reforma në drejtësi do të bëhet, kjo nuk diskutohet”. Kjo është deklarata e sotme e ministrit të Drejtësisë Ylli Manjani, bërë në Konferencën Gjyqësore Kombëtare. Ministri ka folur edhe për atë që e cilësoi si “shthurje të punës së përditshme të gjyqësorit”. Ai deklaroi: “Jo më zvarritje gjyqeve përmes raporteve mjekësore fiktive. Mes gjyqtarëve ekziston tendenca sikur po punohet për ditën e fundit. Kemi tendenca shthurjeje në punën e përditshme të gjyqësorit. Në emër të së ardhmes po iu shesim qytetarëve padrejtësi. Këto gjëra janë të papranueshme për republikën tonë të përbashkët. Secili të bëjë punën që i takon. Askush të mos trembet nga reformat, puna duhet të vijojë”. Ndërkohë Kryetari i Gjykatës së Lartë, Xhezair Zaganjori, ka përcjellë një kërkesë për politikën që të gjejë consensus për reformën në drejtësi. Zaganjori tha: “I drejtoj një apel aktorëve të përfshirë në reformë, që në frymën e opinionit të Venecias, të gjejnë konsensusin. Reforma duhet të ketë si qëllim primar objektivat europianë të vendit. Kemi detyrimin moral për të fokusuar të gjithë vëmendjen në reformimin e gjyqësorit”.
