Ministri i Drejtësisë, Ylli Manjani, tha sot se do të kërkojë përjashtimin e anëtarit të KLD-së, Gjin Gjoni, nga votimi për kreun e gjykatës së Apelit të Tiranës. Qëndrimi i ministrit, mbështetet tek kërkesa e kryetarit aktual të Gjykatës së Apelit, Alaudin Malaj, i cili kishte kërkuar një ditë parë përjashtimine Gjonit për shkak se është në konflikt interesi. Nisur nga kjo kërkesë, Manjani tha: “Është një kërkesë që vjen nga njëri prej kandidatëve për Gjykatës së Apelit. Kërkesën ta parashtroj në KLD”.
Një ditë më parë, Alaudin malaj deklaroi: “Në lidhje me proçesin e vlerësimit të kandidaturës sime për Kryetar të Gjykatës së Apelit Tiranë, çmoj se pozicioni i z. Gjin Gjoni në detyrën e anëtarit të KLD-së, është në konflikt të hapur interesi. Kjo për arsye se, tashmë është bërë publik fakti që zoti Gjoni ka depozituar kallëzim penal ndaj personit tim, më datë 17 Prill 2014, regjistruar në Prokurorinë e Përgjithshme me nr. 1264 Prot. Kjo çështje, pavarësisht se është pushuar nga ana e Prokurorisë së Rrethit Gjyqësor Tiranë me vendim datë 24.04.2014, përbën një fakt serioz i cili ndikon në këtë vendimmarrje të veçantë të Këshillit të Lartë të Drejtesisë duke minuar paanësinë dhe transparencën e kësaj vendimmarrjeje”. Në garë për kë post janë edhe gjyqtarët Hysni Demiraj dhe Gramoz Levanaj.
