“Kjo qeveri është e kapur, po, po është e kapur nga krimi”, ka thënë sot Ylli Manjani, pak pas shkarkimit të tij nga posti i ministrit të Drejtësisë. Ai ka deklaruar sot akuza shumë të ashpra ndaj Ramës dhe ministrave të tij, aq sa duket krejt e palogjikshme vazhdimësia e ministrave të LSI-së në koalicionin qeveritar me PS-në.
Një ndër akuzat shumë të ashpra të ministrit të shkarkuar ishte ajo që lidhet me të shumëkërkuarin, Klement Balili. Gjatë deklaratës Manjani tha ndër të tjera: “Nuk është e rastësishme që është tentuar të asociohet në emrin tim dosja e Klement Balilit, po ndërkohë që në Tiranë bëhej thashetheme i asocimit të emrit tim me Klement Balilin, në Santa Quaranta ministrat e Edi Ramës flinin me dashnoret. Kjo është e vëreteta, flinin aty. Dhe unë këto nuk i di se jam djalë i mençur, por janë të regjistruara nga shërbimet partnere dhe kam marrë përgëzime nga shërbimet partnere për denoncimin e kanabisit. Pse u bë tani? Për të shmangur vëmendjen. Kryeministri priste dorëheqje por unë nuk jap dorëheqjen, se s’kam bërë krim“, tha Manjani.
Ka pasur një sërë akuzash të tjera të artikuluara nga Manjani që lidhen me kanabisin, koncesionet dhe reformën në drejtësi që sipas tij po deformohet. Nëse Manjani është në të njëjtën linjë me Ilir Metën, atëherë vazhdimi i bashkëqeverisjes PS-LSI, duket krejt pa kuptim. Me sa duket në deklaratat e Manjanit, mllefi nuk lidhet vetëm me kryeministrin Rama, por edhe me kryetarin e LSI-së, Ilir Meta, i cili ka vendosur ta “shesë” Manjanin, duke pranuar shkarkimin e tij nga Edi Rama.
