Ministri i Drejtësisë, Ylli Manjani i ka kthyer përgjigje deputetes Majlinda Bregu, pas reagimit të saj mbi ngjarjen e rëndë në qytetin e Fierit.
Manjani ka ndarë të njëjtat shqetësime me zonjën Bregu duke thënë se pyetjet që ajo ka ngritur janë dhe të tijat, prandaj e ka siguruar çeljen e një procesi hetimor administrativ, për t’i dhënë përgjigje pyetjes se përse gruaja jetonte me burrin agresor dhe pas Urdhërit e Mbrojtjes.
Ministri i kërkoi Prokurorisë së Fierit të përfshijë në hetim dhe procesin e lëshimit të urdhërave të mbrojtjes.
Përgjigja e plotë e ministrit Ylli Manjani:
Përshëndetje,
Deputetja dhe kryetarja e Komisionit Parlamentar të Integrimit, zonja Majlinda Bregu ka ngritur një shqetësim në lidhje me ngjarjen e rëndë të Fierit.
Ndaj të njëjtat shqetësime me zonjën Bregu. Ngjarja është tepër e rëndë, aq sa i tejkalon kufinjtë e njerëzores! “Burrë-shtaza” që e ka kryer këtë krim meriton pa dyshim një ndëshkim mbi-njerëzor!
Në këtë moment nuk di shumë detaje për çështjen e lëshimit të urdhërit të ekzekutimit, por pas një interesimi on line të personelit të Ministrisë, del se Gjykata e Fierit ka pranuar edhe provizorisht, edhe përfundimisht kërkesën e zonjës së ndjerë tashmë.
Do të doja të kisha një informacion shterues për pyetjet e zonjës Bregu, por në këtë moment pyetjet që ajo ngre janë edhe të miat.
Pra pyetjet; Përse megjithë urdhërin e mbrotjes e ndjera jetonte përsëri me burrin agresor?!
Kush ka gabuar gjykata që ka lëshuar urdhërin apo zbatuesit e atij urdhëri?!
Megjithë statusin ende të paqartë ligjor, në këtë situatë post-reformë (askush nuk e di tashmë, nëse duhen zbatuar ligjet e reja, që kanë hyrë në fuqi, por nuk zbatohen dot apo do vazhdohet me ligjet e vjetra!!), do të çel nesër një proces hetimor administrativ, për të sqaruar këto pyetje. Në çdo rast ky hetim do sqarojë edhe përgjegjësitë përkatëse.
Ekziston gjithashtu një rrugë tjetër më e shpejtë, hetimi penal që besoj ka nisur tashmë!
Prandaj i kërkoj që sot, Prokurorisë së Fierit të përfshijë në hetim edhe procesin e lëshimit të urdhërave të mbrotjes! Prokuroria ka mundësinë ligjore të sqarimit dhe të veprimit të shpejtë për çdo person përgjegjës!
Sidoqoftë, hetimi ynë administrativ do fillojë nesër!
Duhet mbyllur njëherë e mirë shtegu i “shtazëve” që dhunojnë familjet e tyre! S’ka e s’mund të ketë mbrojtje për shtazët! Mbrotja është paraparë për njerëzit!
Me këtë rast shpreh ngushëllimet e mia më të sinqerta për humbjen e jetës së një gruaje, nënë e dy fëmijëve.
