Peskara ka humbur në shtëpi ndaj Kievos, ndërkohë që sulmuesi nga Lushnja, pas ftesës së De Biazit gjeti edhe një vend titullari në stadiumin “Adriatico”
Pasi mori një ftesë nga De Biazi për ndeshjet ndaj Lihtenshteinit dhe Spanjës, Rei Manaj ka fituar edhe një vend titullari te Peskara, skuadra ku është huazuar nga Interi për këtë sezon. Në fakt, në ndeshjen Peskara – Kievo e nisën ndeshjen nga minuta e parë tre futbollistë shqiptarë, përveç kapitenit Memushaj dhe sulmuesit lushnjar për vendasit edhe Përparim Hetemaj i skuadrës nga Verona.
Mesfushori Hetemaj ka lindur në Skënderaj, por është një futbollist shumë i rëndësishëm i Kombëtares së Finlandës. Në pjesën e parë, Peskara ka dominuar ndjeshëm, ndërkohë që Manaj ka qenë shumë aktiv, madje ishte edhe shumë pranë një tjetër goli për bardheblutë, por ashtu si Memushaj në një tjetër rast, nuk mundën dot ta mposhtnin portjerin Sorrentino.
Në të 68’, Manaj e la fushën e lojës për shkak të një problem në kavilje, ndërkohë që Kievo i Hetemajt, me dy gola të shënuar merr tri pikë shumë të rëndësishme në stadiumin “Adriatico”.
