Kryetari i Partisë Demokratike Lulzim Basha ka kujtuar me anë të një postimi në rrjetet sociale udhëtimin e parë pa viza drejt Europës.
Në postin e ministrit të Brendshëm në atë kohë, Basha së bashku me 50 të rinj dhe të reja ishin shqiptarët e parë që udhëtuan për herë të parë pa viza drejt Brukselit.
Vetëm me pasaporta e tyre biometrike në duar ata bënë check-in në aeroportin e Rinasit pa patur nevojë për asnjë lloj vize dhe me një avion të linjës Tiranë-Bruksel udhëtuan drejt kryeqendrës së BE-së. Pas një udhëtimi prej gati 2 orësh, avioni zbriti në aeroportin e Brukselit.
Kryedemokrati shkruan se 10 vite më parë iu plotësua një ëndërr, ku pas vitesh punë intensive BE vendosi të heqë vizat e udhëtimi për qytetarët shqiptarë.
“Sot 10 vjet më parë, m’u plotësua një ëndërr.
Pas vitesh punë intensive e të vështirë Bashkimi Europian vendosi të heqë vizat e udhëtimi për qytetarët shqiptarë.
Gjatë punës si Ministër i Brendshëm, bashkëpunova ngushtësisht me Bashkimin Europian, vendet anëtare, EUROPOL dhe organizma të tjerë të zbatimit të ligjit për të përmbushur 150 kushtet e vendosura që qytetarët shqiptarë të lëvizin të lirë.
Kjo nuk qe punë e lehtë. Gjatë gjithë kohës kishte njerëz që më thonin se nuk kishte asnjë mundësi për t’ia arritur. Por kjo më motivoi edhe më shumë. Vura në punë përvojën time me institucionet ndërkombëtare dhe të gjitha lidhjet e mia diplomatike të vendosura gjatë nje bashkpunimi të jashtëzakonshëm si ministër i jashtëm, për të realizuar këtë arritje të rëndësishme, të shumë pritur nga mijëra shqiptarë veçanërisht ata që ishin ndarë për së gjalli nga fëmijët e tyre.
Me të njëjtin përkushtim dhe besim që punova për heqjen e vizave dhe anëtarësimin e Shqipërisë në NATO, do të punoj i bindur se së bashku do të bëjmë realitet anëtarësimin e Shqipërisë në Bashkimin Europian”, shkruan Basha
