Miratohet lista e re e barnave me rimbursim, e cila do të nisë të zbatohet duke nisur nga 1 qershori. Mësohet se në listën e vitit 2016 janë përfshirë 60 barna të rinj. Në fokus të rimbursimit janë barnat e diabetit dhe hipertensionit. Sakaq, po ashtu, me rëndësi është dhe rimbursimi i barnave të sëmundjeve të gjakut e psoriazës.
Lista
Në fillim të muajit qershor hyn ligjërisht në fuqi lista e re dhe vetëm nga ky moment do të jetë i mundur rimbursimi i barnave për pacientët në nevojë, sipas listës së re. Lista e barnave të rimbursueshme e vitit 2016 përmban 1118 barna alternativë tregtarë, nga të cilët 539 barna alternativë e parë, nga 490 që përmbante lista e vitit 2015. Gjithashtu, kjo listë përmban 308 principe aktive, nga 280 që përmbante lista e vitit të shkuar. Këta barna përmirësojnë dhe zgjerojnë trajtimin e pacientëve në shërbime onkologjike, gastro-hepatologji, pneumologji, reumatologji, infektiv, në terapinë kardiake, parkinson, diabetit, psoriazës, dislipidemisë, si dhe sëmundjeve të gjakut etj.
Përfituesit
Përveç shtimit të numrit të barnave në LBR e këtij viti, çmimet e miratuara janë me një ulje prej rreth 6.9 për qind, në krahasim me çmimet e aplikuara në LBR e vitit 2015. Ndërkohë, krahas uljes së çmimit të barnave, është rritur edhe buxheti i akorduar për shpenzimet e rimbursimit në raport me vitin 2015. Për këtë vit, buxheti për rimbursimin e barnave është 9 miliardë lekë. Kategoritë që do të vazhdojnë si më parë të përfitojnë barna me rimbursim në masën 50 deri në 100 për qind, do të jenë grupe të tilla shoqërore si pensionistë, invalidë të plotë, fëmijë 0-12 muaj, të sëmurët me kancer, tuberkuloz, të verbrit, jetimët, si dhe një sërë kategorish të tjera.
