Mbaj mend që Dashi ishte shumë i nxehur dhe mezi po e mbanim të shkonte të gjente Dulen, ta kapte për veshi dhe t’i tregonte tokat e Çamërisë. Por, kësaj radhe me sa duket do e marrë kalapiç, për të mbrojtur interesat e grekëve.
Kreu i Partisë Drejtësi, Integrim dhe Unitet, Shpëtim Idrizi është shprehur se është e padenjë dhe e padrejtë vendosja e Dashamir Tahirit i pesti në listën e kandidatëve për deputetë në Vlorë.
“Në listën e PD-së i treti është Vangjel Dule i pesti Dashamir Tahiri. Një konfigurim i tillë është i padrejtë, jo vetëm i padenjë. PD nuk ka pasur asnjëherë 5 deputetë dhe akoma më pak do të arrijë kësaj radhe. Atëherë nuk e kuptoj se ky i pesti ç’a kërkon aty.”,– tha Idrizi.
Idrizi tha që Dule nuk e ka respektuar asnjëherë Çështjen Çame, madje kur ata kanë kërkuar në Kuvend një minutë heshtje, ai nuk është ngritur në këmbë si të gjithë deputetët.
“Do thoni ç’a keni me zotin Dule? Ka qenë një person që vazhdimisht është bërë ngacmues pa sens duke thënë që Çështja Çame nuk ekziston. Një rast kur kërkuam një minutë heshtje në parlament 139 deputetë u çuan më këmbë, vetëm Dule jo, sikur donte të provokonte.”,– tha Idrizi.
Ai kujton se nga situata e krijuar Tahiri kishte dashur ta kapë Dulen për veshi, por kësaj here do ta marrë kalipiç për të mbrojtur interesat e grekëve.
“Mbaj mend që Dashi ishte shumë i nxehur dhe mezi po e mbanim të shkonte tek Dulja. E pashë në një intervistë që thoshte se do e kap për veshi t’i tregoj tokat e Çamërisë, por kësaj radhe me sa duket do e marrë kalapiç. Do punojë që të fitojë Dule”,- u shpreh kreu i PDIU-së.
