Deri në shkurt të vitit të ardhshëm, individët mund të rrisin vlerën e pasurive të tyre të patundshme, me një proçes rivlerësimi që do të hyjë në fuqi në fund të gushtit. Qytetarët do të paguajnë vetëm 2% tatim për rivlerësimin e pronave të tyre të patundshme, ndërsa bizneset 3%. Me ligjin e mëparshëm, tatimi ishte 15% për të gjitha kategoritë.
Të gjithë qytetarët kanë aktualisht mundësinë që të rrisin vlerën e pronave tyre duke paguar shumë pak. Në Fletoren Zyrtare është botuar ligji për rivlerësimin e pasurive të patundshme që do të hyjë në fuqi në fund të gushtit. Sipas ligjit të ri, të gjithë individët që kanë pasuri të patundshme kanë të drejtë që deri më 28 shkurt 2017 të bëjnë rivlerësimin e kësaj pasurie me vlerën e tregut. Ata duhet të pajtojnë një ekspert të licencuar për të bërë vlerësimin e pronës me vlerën e tregut.
Pas vlerësimit të ekspertit, prona mund të regjistrohet në Zyrën e Regjistrimit të Pasurive të Paluajshtme me vlerën e re, kundrejt një tatimi i cili do të zbatohet mbi diferencën mes vlerës së re dhe asaj të mëparshme. Ky tatim është me ligjin e ri 2% nga 15 për qind që ka qenë më përpara.
Le të marrim një shembull: një individ ka blerë një apartament 12 vite më parë me vlerë 30 mijë euro dhe e shet sot 50 mijë euro, duke realizuar një fitim prej 20 mijë euro. Mbi këtë vlerë, ai do të paguajë një tatim prej 2%, të barabartë me 400 euro. Përpara hyrjes në fuqi të ligjit, tatimi që do të paguante do të ishte 15%, ekuivalent me 3 mijë euro.
Rrjedhimisht kur ta shesë pronën, çmimi i blerjes së saj nuk do të konsiderohet më vlera 30 mijë euro por vlera e rivlerësuar 50 mijë euro, duke bërë që diferenca e tatueshme të jetë praktikisht zero.
E njëjta lehtësirë iu ofrohet edhe bizneseve, që duan të rivlerësojnë pasuritë e patundshme, por ndaj tyre tatimi që do të zbatohet do të jetë 3 për qind.
Rivlerësimi i pasurive me tatim të ulët është pjesë e amnistisë fiskale që po ndërmerr qeveria dhe që në shtator do të pasohet nga falja e gjobave për bizneset dhe detyrimeve të papaguara të automjeteve.
RIVLERËSIMI I NJË APARTAMENTI
Vlera 12 vite më parë 30 mijë euro
Vlera e tregut sot 50 mijë euro
Fitimi i realizuar 20 mijë euro
Tatimi sot 2% ose 400 euro
Tatimi më përpara 15% ose 3000 euro
