Tre persona të maskuar kanë grabitur me dhunë një banesë gjatë natës në Ishull Shëngjin.
Sipas policisë grabitësit kanë marrë 1.5 milionë lekë të reja dhe makinën e shtetasit Z.B pronar i banesës ku ndodhi vjedhja.
Grabitja është shënuar rreth mesnatës ndërsa policia është informuar rreth orës 01.20 të 09.08.2016,
Menjëherë në vendngjarje ka mbërritur grupi hetimor që kanë konstatuar se 3 persona të maskuar ,me anë të dhunës kanë vjedhur shumën monetare prej 1.500.000 lekë të reja si dhe një mjet Golf -5 në pronësi të shtetasit Z.B.
Policia thotë se falë veprimeve të shpejta hetimore kishte arritur të lokalizonte mjetin dhe ishte vënë në ndjekje “por autorët e dyshuar të gjendur nën presionin e ndjekjes, kanë braktisur mjetin i cili është gjetur i rrëzuar në një kanal anë rruge dhe autorët e dyshuar janë larguar duke përfituar nga errësira”
Policia po punon për identifikimin e kapjen e autorëve dhe se janë shoqëruar disa persona si dhe janë sekuestruar disa sende në cilësinë e provave materiale.
Vepra penale e regjistruar është “Vjedhja me dhunë, kryer në bashkëpunim” , parashikuar nga neni 139 – 25 i Kodit Penal.
