Kontrolli i Lartë i Shtetit bën me dije se ish-drejtori i ALUIZNI-t të Lezhës, dy ish-përgjegjës dhe një specialist janë kallëzuar penalisht në Prokurori për shkelje të detyrës.
Pas auditimit të kryer, mësohet se katër zyrtarët i kanë shkaktuar shtetit një dëm ekonomik me vlerë 5.9 milionë lekë si dhe shkelje të disiplinës financiare me vlerë 14.3 milionë lekë.
Sipas KLSH-së, të kallëzuarit kanë kryer legalizime në zona të ndaluara me ligj, siç janë ato afër rrugës kryesore, lumenjve, kanaleve kryesore, etj, pa dokumentacion, si dhe duke shmangur pagesat e detyrimeve financiare. Auditimi është kryer për vitin 2014 deri në vitin 2016.
