Anëtarët e Lëvizjes Vetëvendosje do të votojnë sot për të zgjedhur kryetarin e ri. Votimet do të bëhen sipas parimit një anëtar – një votë.
Vendvotimet do të hapen në komunat e ndryshme të Kosovës dhe në mërgatë nga ora 10:00 dhe do të mbyllen në 19:00.
VV thotë se ka bërë të gjitha përgatitjet dhe se adresat e vendvotimeve janë bërë të ditura për anëtarësinë. Pas mbylljes së procesit të votimit do të fillojë procesi i numërimit të votave.
Me përfundimin e numërimit të votave, Komisioni Zgjedhor i Përgjithshëm do të bëjë shpalljen e rezultateve paraprake për votat “për”, “kundër” dhe “abstenim”.
Në garë për kryetar të VV-së është vetëm një kandidat – Albin Kurti.
Kjo vjen pas përçarjeve që e kanë përfshi këtë parti, pasi dorëheqje kanë dhënë nga pozitat e tyre në parti, kryetari Visar Ymeri, nënkryetari Dardan Sjediu, anëtarë tjerë të kryesisë, deputetë, ish sekretari organizativ Dardan Molliqaj dhe kryetari i komunës së Dardanës, Qëndron Kastrati. Dorëheqjet kanë ardhur pas pakënaqësive të tyre me Kurtin dhe zhvillimeve tjera në parti.
