Nga Arben Llalla
Idajet Beqiri i njohur në trojet shqiptare përtej kufirit të shtetit amë si mashtruesi Alban Vjosa po bën moral patriotik duke sulmuar me të gjithë arsenalin e tij prej gënjeshtari deputetët e PDIU, Mesila Doda dhe Shpëtim Idrizin, rreth projektligjit që këta dy deputetë propozuan për heqjen e dekoratave të dhëna në kohën e komunizmit jo për meritë heroike, por për servilizmin ndaj diktaturës. Sulmi mediatik i Idajet Beqirit nuk është i rastësishëm, por i porositur në këtë periudhë delikate, ku të gjitha mediat në Greqi me në krye klerikët e lartë grekë, po sulmojnë zgjidhjen paqësore të çështjes çame, PDIU dhe në veçanti Shpëtim Idrizin.
Avokat Idajet Beqiri sulmon pa doganë, pa frerë dy deputetët e PDIU, jo se i dhimbset çështja e dekoratave të dhëna gjatë diktaturës komuniste, por atij ashtu ja do puna, e ka detyrë shtëpie që të kujdeset për projektet greke antishqiptare.
Idajet Beqiri për ata që nuk e njohin mirë është një mashtrues ordiner, i cili në emër të çështjes të bashkimit kombëtar ka përfituar mijëra marka, dollarë dhe euro. Sipas disa miqve tanë të përbashkët avokat Beqiri në fillim të viteve 1990 kishte miqësi me kolonel Gadafin e Libisë. Idajet Beqiri bënte lobim në ato vite të lulëzimit të mashtrimeve në Shqipëri për të dërguar punëtorë në Libi nga Shqipëria kundrejt një pagese të majme që duhet të paguanin në fillim ata që dëshironin të punonin në Libi.
Bëmat e mashtrimit të Idajet Avokatit i njohur si komandant Alban Vjosa nuk mbarojnë me dërgimin e shqiptarëve tek prehri i kolonel Gadafit, por pasi mbaroj lufta e 2001 në Maqedoni, ai filloj propagandën për një luftë të madhe se do bashkonte të gjitha trojet shqiptare. Në vitin 2002, Idajet Beqiri i njohur si Alban Vjosa filloi propagandën për të mbledhur të holla nëpër botë se gjoja qenka komandanti i përgjithshëm i ushtrisë Armata Kombëtare Shqiptare, AKSH. Në vitet 2001-2004 propagandonte në faqen e internetit të tij se gjoja janë gati rreth 50 mijë ushtarë të AKSH. Atë periudhë kishte djem e vajza naivë që e mbështetën ekonomikisht Idajet Beqirin edhe një bashkëpunëtorin e tij.
Më kujtohet një djalë nga Drenica, nuk po i them emrin e plotë, por veç inicialet, T.V. Ai jetonte në Kanada, vrapoi deri në Gjermani për të takuar Idajet Beqirin dhe i dha një shumë të konsiderueshme dollarësh për Bashkimin Kombëtar që propagandonte Idajet Avokati. T.V. me emocione kombëtare financoi dhe mbante disa faqe interneti që kontrolloheshin nga Idajet Beqiri ato kohë.
Në vitin 2003, Idajet Beqiri i njohur si Alban Vjosa jepte intervista nëpër mediat botërore për luftën e madhe të shqiptarëve për bashkimin kombëtar. Në vitet kur jetoja në Selanik vjen tek unë në emër të Idajet Beqirit një gazetare e njohur gjermane, Renate Flottau, e cila punonte për “Der Spiegel”, për t’u njohur rreth çështjes së shqiptarëve të Greqisë. Ishte korrik 2003 dhe unë kisha disa vite që merresha me studimet dhe kërkimet rreth shqiptarëve të Greqisë të njohur si arvanitas e allvanos.
Gazetarja e “Der Spiegel”, Renate Flottau ishte adresuar tek unë nga Idajet Beqiri, sepse kisha disa vite që botoja në mediat e huaja dhe shqipe shkrime rreth arvanitasve, por kisha qenë dhe kryetar i “Forumit të Emigrantëve Shqiptar në Greqinë e Veriut” dhe sekretar i përgjithshëm i shoqatës “Shqiptarët e Selanikut”. Pra, isha person që e njihja mirë çështjen e shqiptarëve në Greqi dhe politikat greko-shqiptare.
Takimi me gazetaren Flottau u bë në hotel Makedonia në Selanik. Unë nuk e njihja gjuhën gjermane dhe angleze, kështu mora si përkthyese një gazetare tjetër shqiptare, e cila punonte për mediat e Tiranës në Selanik. Pas një bisede të gjatë prej 4 orësh me Renate Flottau rreth arvanitasve, allvanosëve dhe Çamërisë e shoqërova të nesërmen për në fshatrat e Follorinës dhe Kosturit ku ende ka banorë që flasin gjuhën shqipe e deklarohen se janë shqiptarë. Pas takimit me gazetaren e adresuar tek unë nga Idajet Beqiri sigurimi grek mori në pyetje rreth AKSH mua, U.GJ. dhe një shokun e fëmijërisë nga Patosi të Idajet Beqirit, B.M. Lepurushi Idajet Beqiri na kishte paraqitur tek “Der Spiegel” si komandantë të AKSH dhe ne kishim një ushtri me rreth 90 mijë veta. Këto nuk janë përralla, sepse në numrin e 46 të 10 nëntorit 2003 “Der Spiegel” botonte një artikull të autores Renate Flottau sikur ne kishim dhënë intervista si përfaqësues të AKSH. Por, në të vërtetë ne kishim folur për emigrantët shqiptarë në Greqi, për arvanitasit dhe Çamërinë. Pas botimit të shkrimit tek “Der Spiegel” për ushtrinë fantazëm të AKSH-s të Idajet Beqirit, prej atëherë unë, U.GJ. dhe B.M., ndiqemi nga sigurimi serb dhe grek. Atë periudhë lajmëruam përfaqësuesit e diplomacisë shqiptare në Greqi se si është e vërteta, por Idajeti Beqiri i njohur si komandant Alban Vjosa na e kishte ngulur pa dhimbje thellë e më thellë. Shteti shqiptar më tej mësoi se kjo gazetarja e “Der Spiegel” ishte serbe me shtetësi gjermane dhe mike e ngushtë e Millosheviçit. Gjatë ditëve që Ibrahim Rugova ka qenë peng i Millosheviçit në Beograd ka qenë pranë tij edhe gazetarja Flottau. Prandaj i themi Idajet Beqirit që t’i lerë anash ndjenjat e tij patriotike me bateri, sepse e njohim mirë kush është, të ndalë përbaltjen e figurave të njohura, të cilët punojnë për çështjen çame, paqen dhe të drejtat e njeriut. I rikujtojmë opinionit se Idajet Beqiri ka bërë edhe disa muaj burg për bëmat e tij “kombëtare”.
Në përfundim lepurushin Beqiri e këshilloj që këtë shkrim me dorën e tij le ta çojë në gjykatë për të përfituar ndonjë dëmshpërblim, por nga unë do marrë vetëm opingën, sepse pasuri materiale nuk kam, ndërsa pasurinë kombëtare ia kam lënë trashëgim djalit, atë s’mund të ma marrë Idajet Beqiri dhe as ata që qëndrojnë pas tij dhe i japin ndonjë honorar për të përbaltur figurat tona kombëtare.
