Përfundon aventura e Agostinelit në krye të Partizanit, por skuadrën e kuqe do ta drejtojë në aventurën e rradhës në një nga kupat e Europës, një tjetër trajner italian, Adolfo Sormani. Burime brenda klubit e kanë bërë të ditur një gjë të tillë dhe tashmë pritet vetëm konfirmimi zyrtar që do të vijë ndoshta ditën e nesërme. Sormani nuk ka pasur një karierë shumë të pasur si trajner, megjithëse ata që e kanë sygjeruar flasin me superlativa për aftësitë e tij.
“Dodo”, siç është nofka e tij, ka lindur më 11 gusht 1965, ka luajtur si mesfushor dhe ndoshta kulmin e karierës e ka pasur tek Parma në sezonin 1986-1987. Ndërsa i ati, Anxhelo Sormani ka qenë një legjendë në Apenine, ku ka luajtur për Romën, Sampdorian, Fiorentinën, Milanin, Napolin dhe Kombëtaren e Italisë, megjithëse ishte brazilian, ku edhe ka lindur. Madje Sormani senjor ka qenë një trajner i suksesshëm në krye të Romës dhe Napolit.
Sormani junior/ Karriera si trajner:
2003-2004 Koneliano
2004-2006 Kioxhia
2006-2007 Katolika
2007-2010 Juventus (moshat)
2011-2012 Napoli (të rinjtë)
2012-2013 Uatford (zëvendës)
2014-2015 Sudtirol
