Kryeministri i Kosovës, Albin Kurti, ka thënë se nuk është zgjidhje për largimin e profesionistëve shëndetësorë nga Kosova, vetëm duke u munduar të ndalohet ikja e tyre.
Kurti ka thënë se zgjidhje është edhe kthimi i tyre, dhe beson se kjo është e mundur, duke deklaruar se mjekët që vendosin të punojnë vetëm më sektorin publik do të kenë shtesë të veçantë të pagës.
“Profesionistët shëndetësor do të kenë trajtimin e dinjitetshëm në raport me shkollimin. Përveç pagës dhe shtesave standarde, profesionistet shëndetësor që vendosin të punojnë vetëm në sektorin publik ta kenë edhe shtesën e veçantë… Urgjenca për Ligjin e Pagave ka qenë dhe mbetet në planifikimin sa më të afërt të shtetit. Ne besojmë që zgjidhje nuk është vetëm duke provuar që ta ndalosh dikë që të shkojë por të përpiqesh që t’i kthesh ata që kanë shkuar sepse unë besojnë se është e mundshme një gjë e tillë. Nëse përjetojmë një gjendje të panikut ku e konsiderojmë fatale shkuarjen e dikujt, do ta kemi të vështirë ta kthejmë”, ka thënë Kurti gjatë fjalës së tij në Kuvendin e Kosovës.
Më tej, kryeministri u ka bërë thirrje mjekëve që kontributin e tyre të vazhdojnë ta japin në sektorin publik.
