Mimoza Hafizi publikon dokumentin e shkarkimit të mësueses së matematikës në Peshkopi, e cila ishte bashkuar betejës për një politikë tjetër të Shqipërisë mbi Partinë.
Deputetja socialiste, Mimoza Hafizi, ka publikuar sot një dokument sipas të cilit, mësuesja Mandarina Kaca, në Peshkopi, është larguar nga puna vetëm se u aktivizua në mbështetje të deputetëve Ben Blushi e Mimoza Hafizi. Sipas Hafizit, mësuesja është larguar pasi ishte aktivizuar në lëvizjen për një politikë tjetër të Shqipërisë mbi Partinë, gjatë një aktiviteti të zhvilluar pak ditë më parë dhe ku mësuesja ishte mjaft aktive. Sipas Hafizit, largimi nga puna i mësueses është vetëm hakmarrje për përfshirjen e saj në lëvizjen e Blushit dhe Hafizit.
“Para pak ditësh Mandarinës i komunikuan largimin nga puna. Arsyeja: bashkimi me lëvizjen tonë politike. Preteksi: një proces i stisur anketimi, përmbyllur me një vendim të shkruar pa respekt për gjuhën shqipe. Vendimin shiheni vetë, e keni bashkëlidhur.
Ky është sistemi politik i ngritur prej 25 vitesh dhe që po ia merr frymën Shqipërisë. Sistem ku shteti përdoret për interesa politike e korruptive, sistem ku shteti parcelizohet në duar deputetësh që sillen si bajraktarë, sistem ku pushteti mbahet përmes dhunës dhe frikës. Tentuam ta ndryshonim në 2013, por Rilindja e dështoi çdo përpjekje.
Përditë na ndodh që njerëz na takojnë apo na shkruajnë se duan të na bashkohen. Por kanë frikë! Që të mos e pësojnë si mësuese Rina. Që të mos i ndodhë siç parashikoi e reja Flogerta Krypi për prindërit e vet, kur denoncoi pikërisht këtë dhunë në një takim me ambasadorë para pak ditësh. A do të vazhdojmë ta durojmë këtë sistem politik? A bëhemi dot bashkë për ta ndryshuar?”, shkruan Hafizi në facebook.
Deputetja socialiste ka publikuar edhe vendimin, përmes të cilit shkarkohet nga puna mësuesja në Peshkopi.
