Nga Ajkuna Iliri
Një mentalitet i rrënjosur që prej pushtetit diktatorial të Enver Hoxhës apo i vendosur më hershëm nga grekët që përzunë shqiptarët e Çamërisë nga trojet e tyre, qarkullon ende sot; “Çamët janë të pabesë”, e me këtë shprehje vazhdon të luhet ende më ndjenjat e një krahine, jo vetëm mediatikisht e politikisht, por edhe me rrudhje surrati skeptikësh, kur u thua se je çam.
Unë nuk jam çame nga origjina e nënës dhe babait tim. Por, jam çame që fëmijë prej shoqërisë sime të hershmë e deri sot. Kam miq e fqinj, me të cilët ndaj halle e gëzime. Njoh shumë, në çdo fushë, e në asnjë rast nuk njoh ndonjë të ketë treguar pabesi e intrigë, nga jo e përditshmja që ti dëgjon në zyra shteti apo klube showbizzi, që ja kalojnë edhe realizmit human të Balzakut.
Përse kalimi i PDIU-së nga opozita e vetmuar në opozitën zyrtare qenka pabesi, ndërsa tradhtia që kryeministri Rama që nuk është çam, që me një marrëveshje me Greqinë po fshin një krahinë shqiptare, qenka politikë?!
Përse nuk quhet e pabesë, Reme Lala nga Dibra, që mori mandatin me siglën PDIU? Askush nuk e vendosi në listë me forcë, e askush nuk e detyroi të bëhej çame para se të merrte mandatin, por i ktheu shpinën PDIU-së, kur të djelën e një viti më parë u zgjodh deputete. A mund të jetë kjo një e pabesë?
Përse nuk quhet e pabesë Elena Xhina dhe Dritan Bici dy deputetë të qarkut Elbasan, që sot janë deputetë jo për meritë, por se PDIU ju vendosi emrin në listë, ku ata edhën me dëshirë? A nuk janë këta të pabesë që sa morën mandatet nuk qëndruan me siglën që u zgjodhën, por shkuan drejt origjinës së tyre duke mashtruar një elektorat të tërë në këtë qark?
Sepse listat shumëemërore janë në KQZ, ndërsa në fletën e votimit shkruhet sigla e partisë dhe emri i kryetarit. Në të gjithë Shqipërinë vitin e kaluar u votua PDIU dhe Shpëtim Idrizi me rreth 80 mijë vota.
Sot, kalimi politik i kësaj partie nga opozita e vetmuar në opozitën e bashkuar quhet pabesi??? Pse? Sepse është tradhëtuar Çështja Çame, nëse ende nuk e dini… e nuk janë çamët që tradhtuan kauzën e familjet e tyre, por janë këta shqiptarë krahinash të ndryshme që janë të pabesë…
Nuk janë çamët të pabesë, nëse nuk e dini ju që rrini nga mëngjesi në darkë me çamë, hani, pini, bëni biznese, ndani halle e qejf, po jeni ju që sa ktheni shpinën shkruani “tregu çam”…
Nuk janë çamët të pabesë, por janë ata që për një vend pune nga më i vogli deri tek rangu i drejorëve, u bënë çamë, se ju duhej… këta nuk nuk i quani të pabesë, këta sipas jush janë lojtarë të kalibreve të ndryshëm…
E ndoshta nuk do më mbarojë asnjëherë lista me histori e histeri shqiptarësh në rrjetë sociale që linçojnë emra e parti. Shqiptarët në rrugën e tyre janë përballur me tradhëti të mëdha historike, ca nga pabesia e ca nga mosfuqia. Sot, jemi përballë realiteteve politike për të ndryshuar imazhin e vendit jo me besë, por me dije e moral të lartë.
Ndaj lëvizjen politike të Shpëtim Idrizit drejt opozitës zyrtare e vlerësoj maksimalisht, jo vetëm sot, por kështu do jetë nga hera, për aq kohë sa Çështja Çame të zgjidhet. Të pabesët do të jenë gjithmonë ata që e tradhëtojnë këtë kauzë.
