Edhe pak ditë kanë mbetur nga kursi i katërt për video-analistë, kurs që organizohet nga Federata Shqiptare e Futbollit. Pak vende kanë mbetur në dispozicion, pasi në këtë edicion të radhës, kërkesat për të marrë pjesë kanë qenë të shumta. Ky është një rast i shkëlqyer për të gjithë pjesëmarrësit për të mësuar “sekretet” e këtij profesioni të ri në futbollin shqiptar.
Madje nga ky sezon, disa skuadra të kampionatit “Abissnet Superiore” kanë zgjedhur që të kenë në stafin e tyre video-analistë, të cilët kanë dalë nga këto kurse të organizuara nga FSHF dhe gjithnjë e më shumë po vijnë kërkesa që këta video-analistë të gjejnë hapësira edhe në klubet e kategorive më inferiore.
Puna e video-analistit është tashmë fikse në klubet e mëdha dhe po bëhet gjithnjë e më e rëndësishme në punën e çdo stafi. Puna e tij është të mbledhë, përpunojë, analizojë dhe të japë informacione të dobishme për stafin, klubin dhe lojtarët.
Për të qenë një video-analist i mirë duhen shumë aftësi dhe veçanërisht duhet të bëhet një kombinim i mirë i njohurive të futbollit me teknologjinë, pasi është një punë që po zë dhe do të zërë një vend gjithnjë e më të rëndësishëm në botë, që dita-ditës po bëhet më shumë teknologjike.
Kursi do të zhvillohet çdo pasdite, nga 3 maji deri më 7 maj, në ambientet e Shtëpisë së Futbollit dhe do të koordinohet nga vetë drejtuesi i Departamentit të Analizës në FSHF, Alarico Rossi, teksa do të marrin pjesë edhe video-analistë të ekipeve kombëtare të të rinjve dhe video-analistë të kampionatit “Abissnet Superiore”.
Pjesëmarrja në kurs nuk do të jetë vetëm për të marrë një certifikatë që shërben për të ardhmen, por mbi të gjitha, për të thelluar njohuritë futbollistike dhe teknologjike dhe për ta parë botën e futbollit me një sy ndryshe.
Për t’u regjistruar në kurs, kontaktoni Sekretarinë e Shkollës tek adresa e postës elektronike [email protected].
