Nga Tefik Hana
Media është pushtet, i katërti thonë. Dhe si pushtet duhet të jetë i balancuar dhe i kontrolluar. Mediat, nëpërmjet gazetarëve kanë një rol të pazëvëndësueshëm për të bërë transparencen e qeverisë dhe për të nxjerrë politikanë dhe shtetarë abuzivë dhe të korruptuar. Tek ne nuk arrijmë t’i dallojmë se cilën anë mbajnë atë parësoren tyre “interesin publik” apo urdhërin e bosit tyre për një ego personale, për tenderin e radhës, lejen ndërtimit e kështu me radhë.
Ato nuk janë të paafta, por përdorin rrugën tjetër dhe jo të interesit publik.
Dua të ndalem pak tek rasti më i fundit, ku Top Channel, një nga katër kanalet kombëtare, përcolli shqetësimin për dy hidrocentrale mbi kanionet e Osumit. Në dy-tre ditë rresht me anë të kronikave denoncohej krimin e radhës me pasuritë e këtij vendi. Ministrat e linjës u gjendën të papërgatitur provuan të kalonin topin tek tjetri dhe përfundimi ishte dalja e kreut të qeverisë për të rrëzuar poshtë këtë vendim.
Nuk e dimë se çfarë kishte për të ndodhur, nëse nuk do kishte një denoncim të tillë, por në këtë rast Top Channel mbajti interesin publik. Pra, nëse media është profesionale, ajo tund oligarkët, madje dhe qeverinë, kur marrim vendime kundrejt interesit publik.
