Kryetari i Grupit të Komitetit të Punës së Jashtme të PE për Ballkanin Perëndimor, Eduard Kukan ka deklaruar se Maqedonia e Veriut mund të marrë një datë për fillimin e negociatave në vjeshtë, ndërsa ky skenar është më pak realist për Shqipërinë.
Në një intervistë me Shoqatën Sllovake të Politikave të Jashtme (SFPA), Kukan shpjegon se Maqedonia e Veriut ka vite që i plotëson kriteret, por Unioni e shtyu hapjen e negociatave.
“Maqedonisë së Veriut mund t’i jepej një datë specifike në samitin evropian në vjeshtë, të cilën unë e konsideroj realiste. Tirana duhet të zbatojnë një reformë të madhe gjyqësore, opozita bojkoton parlamentin dhe mbi të gjitha shqiptarët nuk mund të gjejnë kompromise”, theksoi ai, duke shtuar se do të ishte joreale që Shqipëria të merrte datën për momentin.
Lidhur me dialogun Beograd-Prishtinë, Kukan edhe një herë shprehu kritika ndaj Përfaqësueses së Lartë Federica Mogherini, e cila, sipas tij, nuk tregoi aftësi të mjaftueshme drejtuese.
I pyetur për idenë e shkëmbimit të territoreve, e cila po qarkullon prej rreth një viti, ai vlerëson se nuk ishte vetëm një strategji fushate.
“Unë pres që çështja e zgjidhjes së njohjes së Kosovës duke shkëmbyer territore me Serbinë do të kthehet. Sidoqoftë, kjo mund të destabilizojë Bosnjën dhe Hercegovinën fqinje”, paralajmëroi Kukan, duke theksuar kundërshtimin e tij ndaj idesë.
