Kryetarja e Lëvizjes Socialiste për Integrim, Monika Kryemadhi, ishte sot e pranishme në Fier në një takim me strukturat e LSI.
Ajo shprehu vendosmërinë për një opozitë të fortë përballë asaj që ajo e quan qeveri e krimit dhe e drogës.
Kryemadhi ironizoi edhe veshjen e kryeministrit pak ditë më parë në Fier, duke thënë se “nuk mund të vijë dikush me poture të deformojë vendin tonë”.
“Edi Rama kërkon të vendosë matësat edhe për ujin, që e kemi pasuri natyrore. Qeveria sot e Rilindjes ka një qëllim, rilindjen e krimit dhe drogës, shkatërrimin e Shqipërisë.
Të gjithë kemi një dilemë, të rrimë në Shqipëri apo të largohemi për të mos u kthyer më mbrapa. Kjo parti nuk do jetë parti politike, por uragan politik që do të çojë në kazan çdo padrejtësi të bërë ndaj shqiptarëve.
Më 25 qershor treguam se sa e qëndrueshme është LSI. Misioni ynë është që të gjithë ata djem e vajza të rikthejnë shpresën, pasi e kanë humbur në Shqipëri. Vetëm kështu mund t’i bëjë ballë ky vend kësaj plage të fortë që i ka bërë Edi Rama.
U deshën qindra shekuj dhe nuk e lëkundën dot këtë komb, nuk mund të vijë dikush që vesh poture për ta deformuar.
Të hyjmë në histori si njerëzit që i bënë barrikadë të keqes, të poshtrës, pabesisë. Kjo do jetë betejë e madhe me varfërimin, korrupsionin, papunësinë”, u shpreh Kryemadhi.
/Tema/
