Qeveria e Kosovës ka vendosur që të dyfishojë ndihmat për kategorinë e qytetarëve që përfitojnë nga skemat sociale, bëri të ditur kryeministri i Kosovës, Albin Kurti. Gjatë mbledhjes së Qeverisë së Kosovës më 1 qershor, Kurti tha se për këtë çështje ka ndarë 6 milionë euro. Ai tha se skema sociale marrin 6 për qind e qytetarëve të Kosovës dhe dyfishimi i shumës do të bëhet për dy muaj rresht, duke shtuar se edhe pensionistët do të ndihmohen me nga 100 euro.
Sipas kryeministrit Kurti, Qeveria po ndihmon kategoritë më të prekura nga rritja e çmimeve të mallrave ushqimore, teksa argumentoi se nuk është e nevojshme një tërheqje e re e mjeteve nga Fondi i Kursimeve Pensionale, që njihet ndryshe edhe si Trust.
Subjekti opozitar, Partia Demokratike e Kosovës ka iniciuar tërheqjen deri në 30 për qind të mjeteve nga Trusti.
Por, Qeveria e Kosovës është shprehur kundër një tërheqjeje të tillë. Kurti tha se nga një vendim i tillë do të përfitonin një pjesë e vogël e qytetarëve.
“Nga mbi 630 mijë llogari që janë të hapura, edhe pse mbi gjysma e tyre janë joaktive në Trustin Pensional të Kosovës, 92 për qind e tyre kanë të akumuluara më pak se 10 mijë euro, kurse 80 për qind të llogarive apo mbi 500 mijë sosh kanë në mesatare vetëm 1,100 euro në llogari. Pjesa më e madhe, apo gjysma e kursimeve janë të koncentruara te më pak se 8 për qind e bartësve të llogarive, pra që kanë afërsisht gjysmën e mjeteve të akumuluara, 1.2 për qind përafërsisht e individëve që kanë llogari në Trust kanë në mesatare 30 fish më shumë se 80 për qind e qytetarëve me llogari të hapura në Trust”, tha Kurti.
Ai shtoi se vetëm 8 për qind e qytetarëve do të ishin përfituesit kryesorë të një skeme, siç e quajti ai, “të rrënimit të Trustit Pensional” të vendit.
Sipas propozimit të PDK-së, kontributpaguesit që kanë më pak se 10 mijë euro kursime pensionale kërkohet që të kenë të drejtën e tërheqjes së 30 për qind të mjeteve.
Ata që kanë deri 20 mijë euro – 25 për qind, nga 20 mijë deri 30 mijë – 20 për qind.
Për kontributpaguesit që kanë kursime pensionale në shumën prej 30 mijë eurosh – 15 për qind dhe ata mbi 40 mijë euro – 10 për qind të shumës.
Një tërheqje e ngjashme deri në 10 për qind është bërë në vitin 2020, pas përkeqësimit të gjendjes financiare të familjeve, për shkak të pandemisë së shkaktuar nga koronavirusi. REL
