Transformimi i Forcës së Sigurisë së Kosovës në ushtri, për Presidentin e Kosovës, Hashim Thaçi kjo është shumë e nevojshme, duke pasur parasysh tensionet që krijohen vazhdimisht në rajon.
Thaçi ka theksuar se në NATO nuk mund të anëtarësohemi në një mënyrë të ndryshme, veçse me ushtri. “Askush nuk të pranon në NATO me zjarrfikës, shoqatë gjuetarësh apo ndonjë shoqatë tjetër, për shembull peshkatarësh”, ka thënë Thaçi.
Presidenti vlerëson se Kosova është e zonja e vetes dhe mund të marrë vendime të rëndësishme për vendin.
“Kosova nuk mund të mbetet peng i krizave të Ballkanit. Nëse Bosnje-Hercegovina është e bllokuar nga nacionalizmi serb, atëherë natyrisht që gjërat janë të ndërlidhura edhe në rajonin tonë, por pse ta paguajmë ne çmimin? Nëse Serbia e rrit nacionalizmin e saj, zhvillon një fushatë elektorale kryekëput nacionaliste, nëse Serbia ka hapur mendje, shpirt dhe gjithçka ka për praninë ruse, pse ta paguajë Kosova çmimin?”, ka thënë Thaçi.
