Ligji i ri i falimentit do kalojë në sitë 35 korporatat që kanë 600 milion euro kredi të pakthyera
Banka Shqipërisë dhe Qeveria në kuadër edhe të angazhimeve të ndërmarra me FMN do të finalizojnë deri në fund të marsit planin e veprimit për trajtimin e 35 korporatave më të madha që mbajnë 65 për qind të kredive me probleme.
Ndër 13 masat e përcaktuara më kryesorja është miratimi në Kuvend i projektligjit të ri të falimentit. Pas atij hapi do të nisë trajtimi i 35 korporatave të cilat tashmë kanë shpallur pazotësinë për të paguar kreditë bankare, që kapin vlerën e 600 milionë eurove.
Pasi drafti i falimentit të ketë kaluar Kuvendin, bankat tregtare në vend do të mblidhen së bashku për të analizuar bilancet e kompanive dhe borxhet që ato kanë. Duke qenë se, disa prej kompanive kanë disa kredi të pakthyera në shumë banka, plani sugjeron ristrukturimin ndërmjet bankave dhe kredimarrëseve për të gjetur një zgjidhje. Por ajo që është e dukshme është fakti se falimenti për 50 për qind të këtyre korporatave është i pashmangshëm, pasi nga analiza e deritanishme kanë rezultuar raste pa asnjë shpresë.
Për kompanitë pjesërisht të shëndetshme, rekomandohet të gjejnë burime alternative jashtë bankave. Këtu mund të ndërhyjë qeveria për të blerë një pjesë të borxhit ose kolateralit të këtyre korporatave në mënyrë që atyre t’iu sigurohen likuiditetet e nevojshme për ristrukturimin.
Pjesa më e madhe e kredive të humbura ose në rrezik serioz arkëtimi nga bankat zotërohen nga rreth 80 kompani dhe korporata të mëdha, të cilat mbartin 80 për qind të portofolit të kredive me probleme, ndërsa vetëm 35 prej këture kompanive mbajnë 65 për qind të portofolit të kredisë së pakthyeshme. Plani i Bankës qëndrore dhe qeverisë parashikon edhe ndërhyrje të tjera si ristrukturimi i borxhit jashtë gjykatës, ndryshimet e Kodit të Procedurës Civile dhe ligjit për përmbaruesit private, me të cilat synohet rritja e efikasitetit të proceseve gjyqësor për mbledhjen me forcë të detyrimeve.
