Ramush Haradinaj ka mbajtur fjalimin para Kuvendit ku ka prezantuar emrat e kabinetit të tij qeveritar, ku gjithashtu ka shprehur prioritet që do të jetë ekonomia dhe integrimi.
Ndër të tjera Haradinaj shprehet se Kosova është në rrezik nga terrorizmi botëror, dhe se qeveria e tij do të punojë në planin e sigurisë në mënyrë që vendi të ndjehet i sigurtë.
“Të rrisim ekonominë. Të hapim vende të reja punë. Para vetës keni disa orientime programore, por programi i qeverisë do ta sjellim në afat të caktuar. Për Kosovën është tepër i rëndësishëm konsolidimi i rendit dhe ligjit. Kosova rrezikohet nga rreziqet e reja dhe të vjetra.
Anëtarësimi i Kosovës në NATO, OKB dhe BE është i domosdoshëm. Kosovës i është stërzgjatur rruga për BE. Kosova nuk shkon në BE por bëhet BE. Do ta forcojmë miqësinë me SHBA. Do të dialojmë edhe me Serbinë. Nuk mund ta ndryshojmë faktin se jemi fqinjë”, ka thënë Haradinaj.
Gjatë fjalës së tij Haradinaj u është drejtuar në serbisht deputetëve të Listës Serbe.
“Shqiptarët i kanë respektuar të tjerët, e me të gjitha pakicat kemi arritur të kemi bashkëjetesë të përbashkët e besoj se këtë do ta arrijmë së edhe me komunitetin serb” deklaroi ai duke sjellë reagimin e ashpër të deputetëve të opozitës për gjuhën serbe.
Deputeti Avdullah Hoti ka mbështetur nismën e Vetëvendosjes, por në mungesë të deputetëve të Listës Serbe, drejtuesi i seancës Kadri Veseli ka vazhduar seancën me debat dhe më pas me një ndërprerje 15 minutëshe.
