Ka arritur në 425 numri i të vdekurve nga koronavirusi kinez, ndërsa mbi 20.000 të tjerë janë të infektuarit.
Në Hong Kong është raportuar vdekja e parë nga koronavirusi, ndërsa të dielën në Filipine ka vdekur personi i parë jashtë Kinës i prekur nga ky virus.
Viktima në Hong Kong, 39 vjeç, ishte kthyer kohët e fundit nga Wuhani, qytet ku mendohet se e ka origjinën virusi.
Koronavirusi kinez është përhapur në 25 shtete të tjera, me mbi 150 të infektuar.
Shumë qytete në Kinë kanë bllokuar transportin publik, ndërsa SHBA dhe Zelanda e re kanë ndaluar udhëtimet në drejtim të Kinës.
Qeveria kineze ka ndaluar edhe lëvizjen e shpeshtë të njerëzve, duke lejuar vetëm një person për familje që të dalë për të blerë mallra.
Disa mjeke italiane deklaruan se kishin izoluar në laborator koronavirusin, që do ta bënte më të lehtë punën për zbulimin e vaksinës kundër virusit vdekjeprurës.
Organizata Botërore e Shëndetësisë ka shpallur emergjencën globale.
