Komisioni i Disiplinës ka thënë fjalën e fundit dhe tashmë Korabi i Peshkopisë do të jetë pjesë e Kategorisë Superiore për sezonin e ardhshëm. Por këtë të drejtë e ka fituar vetëm skuadra, pasi ata që e kanë mbështetur gjatë të gjithë sezonit, për incidentet e ndeshjes së fundit ndaj Kastriotit, gjatë të gjithë sezonit të ardhshëm, ose do ta ndjekin skuadrën e tyre nga ekrani televizionit, ose do të jenë të detyruar të udhëtojnë me kilometra të tëra për ta parë nga afër. Pavarësisht të gjithave, ky është një sukses i madh i skuadrës dibrane, pasi duke përjashtuar ngjarjet e javës së fundit ka zhvilluar një edicion të shkëlqyer, duke i bindur të gjithë skeptikët, se në futboll mjafton shpirti i madh, por edhe dikush që ta marrë seriozisht dhe gjithçka është e mundur. Një ndeshje e fundit të Velipojë, dhe skuadra e Dritan Mehmetit do të jetë midis më të mëdhenjve… por sidoqoftë duhen edhe 90-minuta.
Vendimet e Komisionit të Disiplinës
KF Korabi, për lejim të hyrjes në fushë të spektatorëve pas përfundimit të ndeshjes, duke shkaktuar grindje dhe goditje me ekipin kundërshtar, në bazë të Nenit 12 dhe 66 të KDS, dënohet me ndalimin e zhvillimit të ndeshjeve në stadiumin e qytetit të Peshkopisë, për sezonin futbollistik 2016-2017.
Zyrtarët e KF Kastriotit, Gazmend Vogli dhe Alban Vogli, për nxitje të akteve të dhunës dhe përfshirje në grinde, në bazë të Nenit 11/1/e, 50, 52/1, 136/1/a te KDS, dënohen secili me ndalimin e hyrjes në stadiume për 12 muaj dhe gjobë në masën 150.000 lekë.
