Në korridoret e Kryeministrisë po flitet për një dorëheqje. Burime për 27.al bëjnë me dije se bëhet fjalë për Sekretarin e Përgjithshëm, Ëngjëll Agaçi. Agaçi e mban këtë detyrë që prej shtatorit të vitit 2013. Përveç kësaj ai njihet si një ndër njerëzit më të afërt të kryeministrit Edi Rama. Nga ana tjetër Agaçi ka qenë në qendër të akuzave të opozitës.
Portali Lapsi e përshkruan Agaçin si njeriun që mban fort fijet që lidhin pushtetin me biznesin.
“Ai është shpesh prezent në drekat që Rama shtron tek një restorant luksoz pas kryeministrisë me oligarkët. Ai është në djeni të pothuajse të gjitha kërkesave të tyre ekonomike. Pushteti i tij po rritet ndjeshëm, pasi aktualisht ai po inventarizon edhe të gjitha pasuritë në bregdet, që në kuadrin e Korporatës së Investimeve që pritet të ngrihet për t’i dhënë pa garë tokat dhe pronat bublike biznesmenëve të mëdhenj vendas. Vetëm ky fakt dhe dëshmitë se ai ka filluar kontaktet me njerëz të kësaj fushe për identifikimin e pronave në jug, tregon se ç’pushtet po akumulon ai”,- këmbëngul burimi i protali në fjalë.
